Dwar il-projbizzjoni tal-użu tal-ħama tad-dranaġġ fl-agrikoltura fl-Ewropa 

Il-petizzjonant huwa mħasseb dwar l-użu tal-ħama tad-dranaġġ fl-agrikoltura fl-Ewropa u b'mod partikolari fl-Italja. Huwa jiddenunzja digriet li ġie adottat mill-gvern Taljan li jippermetti l-użu tal-ħama tad-dranaġġ bħala fertilizzant fil-ħamrija agrikola. Skont il-petizzjonant, il-leġiżlazzjoni Taljana u l-aġenzija reġjonali għall-ħarsien tal-ambjent ("l’Arpa Torino") ma japplikawx standards għolja biżżejjed għat-trattament u r-rimi tal-ħama fl-Italja. Il-petizzjonant jispjega li, b'riżultat ta' dan, il-ħama tintuża flimkien ma' skart industrijali ieħor li fih konċentrazzjoni għolja ta' sustanzi kimiċi u twassal għal tniġġis tal-ħamrija. Għalhekk, il-petizzjonant qed ifittex l-għajnuna tal-Parlament Ewropew biex jitlob li jiġi pprojbit l-użu tal-ħama fl-agrikoltura fl-Ewropa.