F'isem il-Federaţia Română pentru Protecţia şi Controlul Animalelor (il-Federazzjoni Rumena għall-Protezzjoni u l-Kontroll tal-Annimali), dwar it-trattament tal-klieb tat-triq fir-Rumanija 

Il-petizzjonant isostni li l-gvern Rumen impona miżuri estremi fir-rigward tal-klieb tat-triq. Huwa jgħid li s-sistema għandha l-għan li tagħmel sterminju sistematiku mill-klieb tat-triq, u li inċident serju li fih kien involut kelb tat-triq intuża bħala skuża biex tiġi legalizzata l-ewtanasja sistematika tal-klieb tat-triq, mingħajr ebda verifika tat-tikketta tal-identifikazzjoni tal-kelb u fi żmien qasir wisq biex sid il-kelb jingħata ċans jiġbor l-annimal li jkun intilef. Allegatament il-klieb jinqabdu permezz ta' metodi krudili, pereżempju bl-użu taċ-"choke collar". Il-petizzjonant isostni li l-leġiżlazzjoni Rumena kkonċernata hija ta' severità bla preċedent fl-UE. Il-petizzjonant jitlob lill-PE jimponi sanzjonijiet kontra r-Rumanija fuq ksur tal-prinċipji Ewropej minquxa fl-istrumenti fundaturi tal-Unjoni, b'mod partikolari r-rispett għall-ħajja u l-integrità fiżika tal-annimali.