F'isem il-vittmi tal-iskema qarrieqa iDental fl-Ewropa, dwar il-ksur tad-drittijiet fundamentali tagħhom mill-kumpanija iDental 

Il-petizzjonant jallega li eluf ta' persuni ġew iffrodati mill-kumpanija iDental u ġarrbu ħsara għal saħħithom. Il-petizzjonant jilmenta li permezz ta' reklamar qarrieqi dwar is-servizzi sussidjati tagħha, il-kumpanija "ġiegħlet" lill-klijenti jiffirmaw tranżazzjonijiet ta' kreditu ma' entitajiet bankarji, u mbagħad sistematikament ittardjat it-trattament tas-snien. Il-petizzjonant jirrapporta li tressqu diversi lmenti kontra din il-kumpanija mal-awtoritajiet tal-konsumaturi u tas-saħħa fi Spanja kollha. Il-petizzjonant iqis li hemm nuqqas ta' regolamenti adegwati f'dan il-qasam. Huwa jitlob li l-Kummissjoni tinvestiga u tivverifika jekk l-awtoritajiet tal-konsumaturi u tas-saħħa Spanjoli kisrux il-leġiżlazzjoni Ewropea li tipproteġi u tirregola d-drittijiet tal-konsumaturi billi ħarġu l-permessi u l-awtorizzazzjonijiet rilevanti lill-kumpanija msemmija.