F'isem 340 organizzazzjoni, dwar il-ftehim ta' kummerċ ħieles bejn l-UE u l-Mercosur, u b'mod partikolari l-każ tal-Brażil 

Il-petizzjoni titlob li n-negozjati dwar il-ftehim ta' kummerċ ħieles bejn l-UE u l-Mercosur jitwaqqfu immedjatament. Il-petizzjonanti jitolbu lill-UE biex tuża l-influwenza tagħha sabiex tipprevjeni l-aggravar tas-sitwazzjoni tad-drittijiet tal-bniedem u dik ambjentali fil-Brażil, billi r-rispett u l-promozzjoni tad-drittijiet tal-bniedem huma għan ewlieni tal-Unjoni. Il-petizzjonanti jsostnu li l-amministrazzjoni tal-Brażil qiegħda tkompli thedded il-funzjonament demokratiku bażiku tas-soċjetà ċivili bil-Ministeru tal-Agrikoltura jsir responsabbli għad-demarkazzjoni tal-art indiġena, li jwitti t-triq għal aktar negozju agrikolu tal-baqar u tas-sojja, u b'dan qiegħda tiġi aċċellerata d-deforestazzjoni. Il-petizzjoni twissi wkoll dwar iż-żidiet ta' territorji indiġeni taħt attakk mill-invażuri u dwar l-attivisti li qegħdin jiġu attakkati u msejħa "terroristi". B'konsegwenza taċ-ċaħda tat-tisħin globali, id-dipartimenti responsabbli għat-tibdil fil-klima ġew aboliti, u għalhekk il-possibbiltajiet tal-implimentazzjoni tal-Ftehim ta' Pariġi tpoġġew f'riskju serju. F'dan il-kuntest, il-petizzjonanti jitolbu wkoll lill-UE biex tiggarantixxi li ma jinbiegħ l-ebda prodott Brażiljan, f'każ li dawn il-prodotti jkunu wasslu għal aktar deforestazzjoni, ħtif tal-art ta' artijiet nattivi jew ksur tad-drittijiet tal-bniedem. Il-petizzjonanti jitolbu wkoll li jingħata appoġġ lis-soċjetà ċivili Brażiljana u li jiġi mmonitorjat il-ksur tad-drittijiet tal-bniedem, b'mod partikolari fil-konfront tal-popli indiġeni u d-difensuri ambjentali.