Andragendet er stilet til: Petitionsausschuss des Europäischen Parlaments

Il-petizzjonanta tistieden lill-UE tikkundanna lill-Gvern Spanjol talli beda kampanja ta' pubbliċità fil-mezzi tal-komunikazzjoni tal-massa tal-pajjiż kontra dak li huwa jsejjaħ "psewdoterapiji" – "Pjan kontra l-psewdoterapiji u l-psewdoxjenzi". Skont il-petizzjonanta, il-gvern investa aktar minn EUR 1.1 miljun f'din il-kampanja, li tipprova tiskredita ċerti terapiji li – skont il-petizzjonanta – huma ta' benefiċċju għas-saħħa u huma rakkomandati minn eluf ta' professjonisti li jippreskrivuhom għal skopijiet ta' saħħa, għall-prevenzjoni tal-mard u għall-benesseri tal-pazjenti. Dawn it-terapiji jinkludu l-agupuntura, li tintuża għat-trattament tal-uġigħ jew bħala rimedju omeopatiku, u hija kkunsidrata bħala prodott mediċinali mill-UE skont l-Artikolu 1(5) tad-Direttiva 2001/83/KE tal-Parlament Ewropew u tal-Kunsill tas-6 ta' Novembru 2001 dwar il-kodiċi tal-Unjoni b'rabta ma' prodotti mediċinali għall-użu mill-bniedem. Il-petizzjonanta tesprimi t-tħassib tagħha dwar id-dewmien fir-regolament dwar il-mediċina omeopatika, peress li fit-28 ta' April 2018 l-Ordni SSI/425/2018, tas-27 ta' April 2018, ġiet ippubblikata fil-Bullettin tal-Istat Uffiċjali, u ġie ddikjarat li l-mediċini omeopatiċi jridu jkunu liċenzjati. Il-petizzjonanta titlob: • li l-Istat Spanjol ikun meħtieġ jikkonforma mal-leġiżlazzjoni Ewropea b'referenza għal dan il-qasam tal-kura tas-saħħa; • l-iżvilupp ta' qafas regolatorju fil-livell Ewropew biex jiġi żgurat li l-mediċina integrattiva, it-terapiji u l-prattika tagħha jitwettqu b'mod sikur u jkunu regolati b'mod akkademiku u xjentifiku b'reazzjoni għad-domanda dejjem tikber min-naħa tal-pazjenti f'dan il-qasam, filwaqt li l-pazjenti jitħallew liberi li jagħżlu t-terapija li jippreferu u l-professjonisti jitħallew liberi li jipprattikaw il-professjoni tagħhom.