Petitsioon on adresseeritud: Petitionsausschuss des Europäischen Parlaments

Il-petizzjonant jgħid li, skont il-bażi tad-data dwar l-użi tal-art agrikola u l-foresti, iż-żona mibnija ta' San Donato Milanese kibret minn 93 għal 688 ettaru bejn l-1954 u l-2015, filwaqt li ż-żona ta' art agrikola ċkienet minn 1 147 għal 475 ettaru. Hu jikkundanna r-reviżjonijiet tal-Pjanijiet tal-Użu tal-Art, li hu jgħid li huma deskritti b'mod mhux korrett li ma jinvolvu "l-ebda konsum ta' art", għax fir-realtà dawn jinkludu miżuri ta' espansjoni urbana maġġuri. B'mod partikolari, il-petizzjonant jgħid li erba' żoni ħodor jinsabu f'riskju f'San Donato Milanese, fejn ġew konklużi ftehimiet li jippermettu l-bini, li jekk isir, jirriżulta fil-qerda ta' ettari ta' ħamrija tajba. Il-petizzjonant għaldaqstant iqis li dawn l-inizjattivi jmorru kontra l-Komunikazzjoni mill-Kummissjoni dwar il-Pjan Direzzjonali għal Ewropa b'Użu Effiċjenti tar-Riżorsi, li stabbiliet l-għan li ż-żieda fl-użu tal-art fl-UE tonqos għal żero sal-2050. Finalment, il-petizzjonant jitlob lill-Parlament Ewropew jintervjeni għall-prevenzjoni tat-twettiq tax-xogħlijiet ippjanati u jiżgura protezzjoni dejjiema tal-art li baqa'.