Dwar it-trattament ħażin tal-annimali selvaġġi, tal-annimali tar-razzett u tal-annimali li jgħixu fit-toroq fir-Rumanija 

Il-petizzjonant jiġbed l-attenzjoni għat-trattament tal-annimali, b'mod partikolari tliet tipi ta' annimali, u jitlob li ssir bidla f'dan ir-rigward. L-ewwel isostni li l-annimali selvaġġi, u b'mod partikolari l-orsijiet, għandhom it-tendenza li jinżlu miż-żoni muntanjużi lejn iż-żoni abitati minħabba r-ritmu mgħaġġel tad-deforestazzjoni fir-Rumanija. Dan ta' spiss iwassalhom biex imutu f'inċidenti tat-traffiku jew minħabba l-kaċċa illegali. Huwa jitlob li jiġi stabbilit protokoll biex parti mill-orsijiet - li huma estinti f'ħafna Stati Membri oħra tal-UE - tiġi ttrasferita f'santwarji u riżervi naturali magħżula. Il-petizzjonant jirreferi wkoll għall-prattiki dwar l-annimali tar-razzett, li allegatament u speċjalment qrib il-festi pubbliċi, jinqatlu b'mod krudili, minħabba t-tradizzjonijiet. Eventwalment jitlob ukoll it-trattament deċenti tal-annimali li jgħixu fit-toroq (klieb u qtates), li skont hu l-proċessi ta' qtil massiv tagħhom huma ffinanzjati minn fondi pubbliċi, mingħajr ebda sforz biex issir sensibilizzazzjoni jew biex jiġu imposti multi għal dawk li jabbandunaw l-annimali fit-toroq. Il-petizzjonant isostni wkoll li n-nissiela irregolari tal-klieb u l-qtates faċilment ibigħu l-annimali fuq l-internet, inklużi annimali affettwati minn mard, mingħajr ebda superviżjoni mill-awtoritajiet.