Peticija se upućuje na: Petitionsausschuss des Europäischen Parlaments

Il-petizzjonant jirrimarka li l-koppji omosesswali għadhom qed jiġu ttrattati b'mod differenti fi Stati Membri differenti u għadhom fi żvantaġġ meta mqabbla ma' koppji eterosesswali, minkejja l-garanziji ta' ugwaljanza inkorporati fit-Trattati u fil-Karta tad-Drittijiet Fundamentali tal-Unjoni Ewropea. Minkejja l-protezzjoni mogħtija liż-żwiġijiet u lill-familji, il-koppji binazzjonali tal-istess sess isibuha aktar diffiċli, pereżempju, biex jiksbu r-rikonoxximent taċ-ċertifikati taż-żwieġ fi Stat Membru ieħor. L-Istati Membri qed jadottaw ukoll liġijiet li effettivament jinvalidaw id-drittijiet fundamentali mnaqqxa fil-Konvenzjoni Ewropea dwar id-Drittijiet tal-Bniedem. Il-petizzjonant jindika li l-awtoritajiet Ġermaniżi qed jirrifjutaw li jirrikonoxxu ż-żwieġ tiegħu ma' ċittadin Netherlandiż, li seħħ fl-2011, li joħorġu passaport għas-sieħeb tiegħu jew li jagħtuh id-dritt tal-vot, sakemm ma jirrinunzjax għal ċerti drittijiet, li effettivament ħallewh apolidu. Barra minn hekk, b'differenza minn raġel eterosesswali, huwa m'għandux id-dritt li jfittex rimedju quddiem il-qrati. Il-petizzjonant għalhekk qiegħed jitlob l-adozzjoni ta' liġi Ewropea li jkun fiha definizzjonijiet uniformi ta' kunċetti bħall-ġeneru u ż-żwieġ, flimkien mar-rikonoxximent tad-drittijiet tal-minoranzi LGBT.