F'isem l-"EU Rights Clinic" (il-Klinika tad-Drittijiet tal-UE) u l-"Platform for International Cooperation on Undocumented Migrants" (il-Pjattaforma għall-Kooperazzjoni Internazzjonali dwar il-Migranti bla Dokumenti) (PICUM), dwar il-kompatibbiltà tal-Iskema ta' Residenza l-ġdida tal-UE għaċ-ċittadini tal-UE li jgħixu fir-Renju Unit mad-dritt tal-Unjoni 

Il-petizzjoni tikkonċerna l-allegat nuqqas tal-awtoritajiet tar-Renju Unit milli jikkonformaw mad-dritt tal-Unjoni fir-rigward tal-Iskema ta' Residenza pilota tal-UE. L-Iskema ta' Residenza tal-UE hija prevista li tibda taħdem meta r-Renju Unit joħroġ mill-UE fit-tmiem tal-perjodu tranżitorju (31.12.2020). Peress li matul dan il-perjodu, ir-Renju Unit se jibqa' Stat Membru tal-UE, u għalhekk se jibqa' obbligat japplika d-dispożizzjonijiet sostantivi tad-dritt tal-Unjoni, il-petizzjonant iħeġġeġ lill-Parlament Ewropew jieħu azzjoni dwar għadd ta' rakkomandazzjonijiet biex jiżgura li l-awtoritajiet tar-Renju Unit ma jevitawx l-applikazzjoni tal-Ftehim dwar il-Ħruġ. L-ewwel nett, il-petizzjonant jirrakkomanda li l-Iskema ta' Residenza tal-UE jenħtieġ li tipprovdi kopja stampata tad-dokument ta' residenza diġitali biex din ikollha valur probatorju. It-tieni nett, peress li l-Iskema tapplika għall-membri tal-familja ta' ċittadini Brittaniċi li jirritornaw lejn ir-Renju Unit wara li jkunu għexu fi Stat Membru ieħor, l-Iskema jeħtieġ li tikkonforma mar-regoli tal-UE dwar id-dritt li jirritornaw wara li jkunu għexu fi Stat Membru ieħor. It-tielet nett, l-Iskema ta' Residenza tal-UE jenħtieġ li tiġi estiża wkoll biex tinkludi l-persuni ewlenin li jindukraw liċ-ċittadini Brittaniċi li jgħixu fir-Renju Unit. Ir-raba' nett, ir-raġunijiet obbligatorji għaliex ġew irrifjutati l-applikazzjonijiet jidhru li huma diskriminatorji, li jmorru lil hinn minn dak li huwa permess skont id-dritt tal-Unjoni, u din hija r-raġuni għaliex intalbet reviżjoni. Il-ħames nett, l-Iskema ta' Residenza tal-UE trid tippermetti lill-persuni vulnerabbli jressqu tard applikazzjonijiet għal status ta' residenza tal-UE. Il-petizzjonant jissuġġerixxi wkoll li s-servizzi ta' assistenza tal-UE (jiġifieri SOLVIT u Pariri tal-Ewropa Tiegħek) jenħtieġ li jkunu jistgħu jkomplu joffru pariri u assistenza lill-applikanti taħt l-Iskema.