F'isem "Collectif des citoyens européens du narbonnais", dwar id-dritt ta' kull ċittadin li jgħix qrib is-sit Orano Malvési għal għajxien f'ambjent b'saħħtu 

Il-petizzjonanta tirreferi għar-reġjun ta' Occitanie f'Languedoc, reġjun awtentiku produttur tal-inbid li huwa apprezzat ħafna minn komunità ta' Ewropej li qed tikber b'rata mgħaġġla, li jinsab qrib Narbonne. Anqas minn 2 km bogħod mid-distretti residenzjali ta' Narbonne, il-kumpanija Orano Malvési-Narbonne, li tappertjeni għall-Istat Franċiż u investituri internazzjonali, tippurifika 25 % tal-uranju kollu madwar id-dinja u 100 % tal-uranju fi Franza. Dan huwa kklassifikat bħala sit SEVESO b'limitu għoli. Mill-1959, ġew ipproċessati 500 000 tunnellata ta' uranju, li jfornu l-uranju għal 58 reattur nukleari fi Franza, imsieħba oħra fl-Ewropa u klijenti barranin. Il-ħażna ta' skart kontaminat (400 000 m3) hija kklassifikata bħala Installazzjoni Bażika Nukleari (Basic Nuclear Facility – BNF). Is-sit jarmi inkwinanti kimiċi u klimatiċi fl-ambjent, inkluż fil-Canal de la Robine (sit ta' patrimonju tal-UNESCO), li jiskula fil-laguna f'Étang de Bages-Sigean, żona protetta ta' Natura 2000. Meta fl-2004, inkiser dyke u ħareġ 30 000 m3 ta' ħama radjuattiva, bdew protesti pubbliċi, minħabba l-impatt ambjentali (fl-arja, fl-ilma, fil-ħamrija u fix-xtut) u l-perikli. Qrib is-sit, fuq pjanti u uċuħ tar-raba' (frott, ċereali), ġie identifikat l-uranju u prodotti sekondarji oħra. Il-petizzjonanta tirreferi wkoll għal rata ta' mwiet ogħla b'mod sinifikanti minħabba kanċer tal-pulmun u għall-fatt li ma sar l-ebda studju epidemjoloġiku. Ġew awtorizzati faċilitajiet ġodda li jipprovokaw rilaxxi addizzjonali li se jżidu aktar minn 40 000 3 ta' gassijiet tossiċi fis-siegħa mal-livell attwali ta' emissjonijiet. Il-petizzjonanta qed tikkontesta l-legalità tal-inkjesta pubblika li saret qabel ma ngħatat din l-awtorizzazzjoni. Fl-2018, ġiet awtorizzata fabbrika li timmanifattura d-diossidu tal-uranju, din id-darba mingħajr ebda konsultazzjoni pubblika jew studju dwar l-impatt u mingħajr ma ġiet infurmata l-popolazzjoni lokali dwar il-konsegwenzi tas-saħħa, ekoloġiċi u ekonomiċi. Il-"Collectif des citoyens européens du narbonnais" iddeċidew li jitolbu d-dritt tagħhom li jgħixu f'ambjent san biex fil-futur jiġu evitati diżastri ambjentali jew tas-saħħa pubblika.