Dwar l-impatt ambjentali tal-batteriji użati fil-karozzi elettriċi  

Fl-opinjoni tal-petizzjonant, skont l-aħħar riċerka, il-magni tal-kombustjoni huma ħafna aktar ekoloġiċi mill-karozzi li jużaw il-batteriji elettriċi. Huwa jsostni li l-produzzjoni tal-karozzi elettriċi ma tagħmilx inqas ħsara lill-ambjent mill-produzzjoni tal-magni tal-kombustjoni. Huwa jsostni wkoll li l-promozzjoni ta' karozzi elettriċi biss qiegħda deliberatament teqred l-industrija Ewropea tal-karozzi. Il-petizzjonant jelenka diversi piżijiet ambjentali li jirriżultaw mill-użu ta' batteriji fil-karozzi: it-tħaffir għal-litju, li jeqred in-natura minħabba l-metodi invażivi użati għall-estrazzjoni tal-litju mill-blat bl-użu ta' sustanzi kimiċi mhux degradabbli, u l-ispejjeż tat-trasport u t-tniġġis li jirriżultaw mit-trasport tal-litju għall-manifatturi tal-batteriji u sussegwentement għall-produtturi tal-karozzi madwar id-dinja. Barra minn hekk, huwa jiddeplora diversi żvantaġġi fil-karozzi elettriċi, bħall-prezz għoli tal-batteriji (anke bis-sussidji tal-UE), in-nuqqas ta' garanzija għall-firxa ta' kilometri (li tvarja skont diversi fatturi bħat-tagħbija, il-veloċità, il-kundizzjonament tal-arja) u l-kapaċità tal-batterija wara 2-4 snin, l-ispejjeż għoljin ħafna għall-iċċarġjar mill-ġdid fi stazzjon ta' ċċarġjar veloċi u n-nuqqas ta' infrastruttura f'aktar minn 80% tat-territorju tal-UE. Huwa għandu wkoll id-dubji tiegħu dwar il-valur tal-bejgħ mill-ġdid u t-tiswija u l-ispejjeż għaż-żarmar tal-karozzi elettriċi.