F'isem l-"EU Rights Clinic" (il-Klinika tad-Drittijiet tal-UE), dwar l-implimentazzjoni tad-Direttiva 2004/38/KE fil-Belġju 

Il-petizzjonant jilmenta dwar il-verifika sistematika mill-awtoritajiet Belġjani tad-drittijiet ta' residenza taċ-ċittadini tal-UE meta dawn tal-aħħar jitolbu benefiċċji soċjali. Fl-opinjoni tal-petizzjonant, din il-verifika sistematika tmur kontra l-prinċipji stabbiliti mid-Direttiva 2004/38. Il-petizzjonant isostni li, skont id-Direttiva, din il-verifika jenħtieġ li sseħħ biss meta jqumu xi dubji fir-rigward tad-drittijiet ta' residenza tar-rikkorent, u mhux bħala azzjoni awtomatika. Għalhekk, il-petizzjonant jitlob lill-Kumitat għall-Petizzjonijiet jieħu azzjoni biex jiżgura li l-Awtoritajiet Belġjani jindirizzaw u jsolvu l-problema deskritta fil-petizzjoni. Il-petizzjonant jistieden ukoll lill-Parlament Ewropew jagħmel seduta ta' smigħ dwar il-kwistjoni, biex joħroġ rapport fuq inizjattiva proprja dwar l-allegata applikazzjoni żbaljata tal-Belġju fir-rigward tad-dritt tal-Unjoni u biex tiġi ppreżentata mozzjoni għal riżoluzzjoni mill-Parlament Ewropew li tistieden lill-awtoritajiet Belġjani jsolvu l-problema.