Dwar pjan biex tiġi eliminata l-kontaminazzjoni bil-lindan fi Spanja u madwar l-UE 

Il-petizzjonant jiddikjara li l-lindan huwa pestiċida perikoluża u persistenti prodott f'diversi postijiet fi Spanja matul is-snin 70 u 80, speċjalment f'Baracaldo (Vizcaya) u Sabiñánigo (Huesca). Il-petizzjonant huwa tal-fehma li l-ġestjoni ta' dan l-iskart kienet negliġenti billi xxerred f'postijiet differenti fi Spanja b'kontrolli skarsi, speċjalment fiż-żoni madwar il-muniċipalitajiet fejn is-sustanza ġiet prodotta. Minkejja l-fatt li għaddew bosta għexieren ta' snin mill-waqfien tal-manifattura u l-użu tiegħu, il-persistenza għolja tiegħu tirriżulta fil-preżenza kontinwa tiegħu fil-ħamrija u l-ilma. Il-petizzjonant ifakkar li x-xmara Gállego fil-Komunità Awtonoma ta' Aragona ġiet affettwata b'mod partikolari minn din il-kontaminazzjoni. Il-lindan, bħala sustanza niġġiesa organika persistenti, huwa pprojbit mill-Konvenzjoni ta' Stokkolma u r-Regolament 850/2004. Madankollu, din is-sustanza tkompli takkumula u tippersisti fl-ambjent, filwaqt li diversi studji xjentifiċi wrew li anke ammonti żgħar huma ta' theddida għas-saħħa tal-bniedem, l-annimali u l-ekosistemi. Il-petizzjonant jilmenta dwar il-livelli għoljin ta' tniġġis mil-lindan f'xi postijiet fi Spanja, mhux biss fil-Pajjiż Bask u Aragona, iżda wkoll f'Kastilja u León, Kastilja-La Mancha, fil-Komunità Awtonoma ta' Madrid, Galicia, il-Katalonja u l-Andalusija. Ir-residwi ta' din il-pestiċida nstabu f'dawn ir-reġjuni kollha. Minkejja dan, il-Gvern Spanjol s'issa kważi ma għamel xejn biex jirrettifika din is-sitwazzjoni. Il-petizzjonant jistieden lill-Parlament Ewropew biex jagħmel pressjoni għal investigazzjoni dettaljata dwar din il-kwistjoni u biex iħeġġeġ lill-istituzzjonijiet Ewropej l-oħra biex jieħdu sehem attiv fis-riżoluzzjoni ta' din is-sitwazzjoni, li tibqa' perikoluża għan-nies u għall-ambjent. Il-petizzjonant iqis li huwa importanti ħafna li jkun hemm konformità mal-leġiżlazzjoni Ewropea dwar il-ħarsien tal-ambjent u mad-Direttiva Ewropea dwar l-Ilma, u li jiġi stabbilit pjan speċifiku għall-eliminazzjoni sħiħa tal-iskart tal-lindan li jibqa' f'ħafna postijiet fi Spanja. Il-petizzjonant jitlob ukoll li tiġi promossa azzjoni koordinata fi ħdan l-istituzzjonijiet Komunitarji permezz ta' pjan komprensiv għad-dekontaminazzjoni tal-lindan, minħabba l-eżistenza ta' siti kkontaminati f'pajjiżi oħra tal-Unjoni Ewropea.