F'isem l-organizzazzjoni mingħajr skop ta' qligħ Still I Rise, dwar allegati abbużi kontra minorenni mhux akkumpanjati u l-kundizzjonijiet tal-għajxien tagħhom fil-kamp tar-refuġjati ta' Samos fil-Greċja 

Petition addressed to: Petitionsausschuss des Europäischen Parlaments

Il-petizzjonant jiddenunzja l-abbużi inaċċettabbli kontra l-minorenni mhux akkumpanjati u l-ksur tad-drittijiet tal-bniedem tagħhom mill-awtoritajiet fil-kamp tar-refuġjati ta' Samos fil-Greċja. Skont id-data pprovduta mill-petizzjonant, 19% tat-tfal li jgħixu f'dan il-kamp tar-rifuġjati mhumiex akkumpanjati minn membru tal-familja jew tutur u għalhekk huma mċaħħda minn protezzjoni adegwata. B'mod partikolari, huwa jirreferi għal distribuzzjoni ħażina tal-ikel u għal nuqqas ta' kura tas-saħħa xierqa u ta' appoġġ legali u psikoloġiku. Huwa jikkundanna l-abbużi fil-proċeduri ta' akkoljenza u identifikazzjoni għall-minuri, il-malnutrizzjoni, il-kundizzjonijiet ħżiena tal-iġjene u l-vjolenza mill-pulizija, li kollha kemm huma jammontaw għal kundizzjonijiet terribli ta' għajxien għall-minorenni b'riperkussjonijiet serji għas-saħħa fiżika u mentali tagħhom. Għalhekk, il-petizzjonant jistieden lill-istituzzjonijiet tal-UE biex itemmu dan il-ksur sistematiku tad-drittijiet tal-bniedem ta' minorenni mhux akkumpanjati.