Dwar il-ġbir tad-dejn fir-Rumanija 

Il-petizzjonant jiddenunzja l-prattika ta' aġenziji tal-ġbir tad-dejn barranin li jixtru djun mingħand kumpaniji Rumeni, l-aktar banek, imbagħad jassenjaw il-ġbir lil aġenziji tal-ġbir tad-dejn Rumeni. Il-petizzjonant isostni li l-proċeduri ta' infurzar imressqa minn dawn tal-aħħar qed jiksru l-liġi Rumena, li ma tippermettilhomx li jirrappreżentaw entità legali oħra fil-qorti. Huwa jsostni wkoll li l-aġenziji tal-ġbir tad-dejn jiksru r-Regolament Ġenerali dwar il-Protezzjoni tad-Data minħabba li jipproċessaw data personali ta' debituri li qatt ma kienu f'kuntatt dirett magħhom u li qatt ma taw il-kunsens tagħhom għal dak l-għan. Il-petizzjonant isostni li l-aġenziji tal-ġbir tad-dejn barranin huma fil-fatt ditti tal-investiment kif definit mid-Direttiva 2014/65/UE u jwettqu attivitajiet ta' investiment fuq bażi professjonali, li jfisser li għandhom jiġu awtorizzati kemm fir-Rumanija kif ukoll fil-pajjiż tal-oriġini tagħhom, li mhuwiex il-każ.Informazzjoni– Il-petizzjonant jallega l-ksur tal-leġiżlazzjoni tal-UE li ġejja: (i) ir-Regolament (UE) 2016/679 dwar il-protezzjoni tal-persuni fiżiċi fir-rigward tal-ipproċessar ta' data personali u dwar il-moviment liberu ta' tali data (ir-Regolament Ġenerali dwar il-Protezzjoni tad-Data); (ii) id-Direttiva (UE) 2016/680 dwar il-protezzjoni ta' persuni fiżiċi fir-rigward tal-ipproċessar ta' data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta' reati kriminali jew l-eżekuzzjoni ta' pieni kriminali, u dwar il-moviment liberu ta' tali data; (iii) id-Direttiva 2014/65/UE dwar is-swieq fl-istrumenti finanzjarji (iv) ir-Regolament (UE) 575/2013 dwar ir-rekwiżiti prudenzjali għall-istituzzjonijiet ta' kreditu u d-ditti tal-investiment