Dwar il-libertà tal-moviment wara l-Brexit 

Il-petizzjonanta hija mħassba li parti kbira tal-popolazzjoni Brittanika tista' żżomm id-drittijiet tal-libertà tal-moviment fl-UE ladarba l-perjodu ta' tranżizzjoni jintemm, filwaqt li dan mhux se jibqa' l-każ għaċ-ċittadini tal-UE li jixtiequ jeżerċitaw dik il-libertà fir-Renju Unit. Fil-fehma tagħha, dan huwa minħabba li 10 fil-mija tal-popolazzjoni Brittanika hija eliġibbli li tapplika għaċ-ċittadinanza Irlandiża.Hija tissuġġerixxi li ċ-ċittadini Brittaniċi, li huma wkoll ċittadini ta' pajjiż tal-UE iżda li qatt ma għexu hemm, għandu biss jinħarġilhom passaport temporanju minn dak il-pajjiż, li ma jkunx validu biex huma jeżerċitaw il-libertà tal-moviment fl-UE. Huwa biss wara li jkunu qattgħu ċertu perjodu ta' residenza f'dak il-pajjiż tal-UE li huma għandhom ikunu eliġibbli biex japplikaw għal passaport normali tal-UE. B'analoġija, hija tissuġġerixxi li r-rekwiżit ta' residenza għandu japplika wkoll għaċ-ċittadini kollha ta' pajjiżi terzi li huma wkoll ċittadini tal-UE iżda li qatt ma għexu f'xi pajjiż tal-UE.