Peticija se upućuje na: Petitionsausschuss des Europäischen Parlaments

Il-petizzjonant jesprimi t-tħassib tiegħu dwar żieda fil-każijiet ta' abbandun tal-klieb matul il-kwarantina deċiża mill-Gvern Spanjol biex inaqqas it-tixrid tal-COVID-19. Xi persuni jibżgħu li l-annimali domestiċi tagħhom jistgħu jgħaddulhom il-virus. Din l-istess sitwazzjoni qed tiġi replikata fi Stati Membri oħra. Il-petizzjonant isostni li, f'pajjiżi partikolarment milquta ħażin mill-COVID-19, bħaċ-Ċina jew l-Italja, l-annimali sofrew il-konsegwenzi ta' dan il-paniku soċjali mifrux. Fiċ-Ċina waslu saħansitra biex jissagrifikaw il-klieb tagħhom billi waddbuhom 'il barra mit-twieqi, filwaqt li fl-Italja diversi organizzazzjonijiet irrappurtaw li kien hemm diġà aktar minn 2,000 każ ta' klieb abbandunati. F'dan il-kuntest drammatiku, xi entitajiet, bħall-Organizzazzjoni Dinjija tas-Saħħa (WHO), ifakkru li l-klieb ma jistgħux isofru minn din il-marda jew ixerrduha, u għalhekk jitolbu l-kalma mill-popolazzjoni. Għar-raġunijiet kollha msemmija hawn fuq, fid-dawl tat-traġedja esperjenzata mill-pajjiżi kollha tal-Ewropa, il-petizzjonant jixtieq iwassal lill-Parlament Ewropew it-tħassib dwar din il-problema tal-eluf ta' annimali domestiċi abbandunati, li saret aktar gravi fil-kuntest tal-pandemija tal-coronavirus. Il-petizzjonant jaħseb li l-istituzzjonijiet Ewropej għandhom jiżviluppaw strateġiji ta' emerġenza komunitarji sabiex jindirizzaw din il-problema sakemm iddum il-kriżi tal-coronavirus, billi jippromwovu l-ftuħ ta' xelters għall-annimali abbandunati u kampanji ta' sensibilizzazzjoni pubblika fil-livell Ewropew f'dan ir-rigward. Il-petizzjonant jemmen li hemm bżonn jinħoloq fond ekonomiku Ewropew speċifiku biex jirrispondi għal dawn l-emerġenzi u jirrinforza l-azzjonijiet imwettqa mill-Istati Membri f'din il-kwistjoni serja li tikkawża wkoll tħassib għal bosta Ewropej u assoċjazzjonijiet għad-difiża tad-drittijiet tal-annimali.