Dwar il-miżuri biex jiġi promoss id-dritt tal-paga ugwali għal xogħol ugwali fl-UE 

Petition addressed to: Petitionsausschuss des Europäischen Parlaments

Il-petizzjonant jindika li minkejja li l-prinċipji tal-ugwaljanza u tal-paga ugwali huma fost il-valuri fundamentali tal-Unjoni Ewropea, għadha sseħħ diskriminazzjoni fost il-ħaddiema pubbliċi fil-pulizija Spanjola, fejn il-petizzjonant jallega li l-ħaddiema jirċievu salarji differenti għall-istess impjieg. Diskriminazzjoni indiretta sseħħ fir-rigward tal-ħlas adegwat u l-benefiċċji soċjali li jiġu rċevuti mill-irġiel u min-nisa. Il-petizzjonant jistqarr li fl-2008, il-proposta għal Direttiva dwar l-implimentazzjoni tal-prinċipju ta' trattament ugwali barra mis-suq tax-xogħol (Direttiva kontra d-diskriminazzjoni) ġiet imblukkata mill-Kunsill. Fil-laqgħa tal-15 ta' Ġunju 2017 tal-Kunsill Impjiegi, Politika Soċjali, Saħħa u Affarijiet tal-Konsumatur, il-Kummissarju Ewropew għall-Impjiegi, l-Affarijiet Soċjali, il-Ħiliet u l-Mobilità tal-Ħaddiema, Marianne Thyssen, affermat mill-ġdid li d-direttiva tibqa' prijorità għall-Kummissjoni. Il-petizzjonant jistaqsi sa liema punt l-Istati Membri jridu jħarsu l-valuri fundamentali tal-Unjoni, filwaqt li jqisu l-allegat nuqqas ta' miżuri legali.