Dwar kwistjonijiet ta' migrazzjoni fil-Greċja, b'mod partikolari fil-gżira ta' Samos 

Il-petizzjonanta tistieden lill-istituzzjonijiet tal-UE jieħdu azzjoni biex isolvu dik li hija tiddeskrivi bħala qagħda mwiegħra fil-Greċja peress li tospita għadd kbir ta' migranti. Il-petizzjonanta, ċittadina Ġermaniża, tgħix fil-gżira ta' Samos u tiddeskrivi l-esperjenza li tgħaddi minnha kuljum peress li ma tistax tagħmel użu mis-servizzi pubbliċi bażiċi minħabba l-preżenza ta' gruppi kbar ta' migranti, li jgħixu f'kundizzjonijiet mhux dinjitużi u jpoġġu pressjoni fuq il-fornituri tas-servizzi pubbliċi. B'mod partikolari, il-petizzjonanta tirreferi għal kjuwijiet twal fl-uffiċċji tal-posta, fejn il-migranti jistennew trasferimenti tal-flus, u l-isptarijiet pubbliċi, fejn ta' spiss il-migranti jiġu ttrattati bi prijorità, allegatament minħabba l-biża' ta' mard li jista' jittieħed, u dan iwassal biex il-popolazzjoni lokali ma tinqediex kif xieraq. Il-petizzjonanta hija tal-fehma li s-sitwazzjoni attwali li jgħixu fiha l-migranti fil-gżira hija ta' żvantaġġ għalihom kif ukoll għall-abitanti lokali tal-gżira. Il-petizzjonanta tirreferi għall-ħtieġa li jiġu ddedikati aktar fondi tal-UE biex jgħinu lill-migranti u tiġi ġestita aħjar il-pressjoni min-naħa tal-migranti fuq is-servizzi pubbliċi madwar l-Unjoni kollha, pjuttost milli jitqiegħed piż eċċessiv fuq il-Greċja bħala pajjiż li għadu qed jirkupra minn kundizzjonijiet ta' kriżi. Għalhekk, hija tistieden lill-istituzzjonijiet tal-UE jagħmlu sforzi akbar biex jappoġġjaw inizjattivi ta' finanzjament b'rabta mal-migrazzjoni fuq livell lokali, u mhux li jinvestu f'dawk li l-petizzjonanta tiddeskrivi bħala proġetti pubbliċi appoġġjati mill-UE li mhumiex ta' prijorità bħal mużew marittimu fil-qrib.