La petizione è indirizzata a: Petitionsausschuss des Europäischen Parlaments

Il-petizzjonant jikteb li, primarjament minħabba għadd ta' ostakoli amministrattivi u proċessi twal u kkumplikati ta' reġistrazzjoni, ħafna studenti tal-Erasmus ma jirreġistrawx bħala residenti fil-pajjiżi ospitanti tagħhom, li jista' joħolqilhom problemi f'oqsma bħat-trasport, l-integrazzjoni, it-trasparenza u anki l-protezzjoni legali. Bil-għan li jittejjeb il-programm Erasmus+ li jmiss (2021-2027), il-petizzjonant jissuġġerixxi li l-proċess biex jiġi aċċessat il-programm jiġi armonizzat u diġitalizzat bil-għan li l-aċċettazzjoni minn università ospitanti tiġi bid-dritt ta' residenza fil-post fejn tkun tinsab l-università għat-tul tal-iskambju. Fuq il-bażi ta' inizjattivi eżistenti bħall-"Erasmus mingħajr karti" u l-proġett pilota tal-"Kard Ewropea tal-Istudenti", il-petizzjonant jipproponi li jinħoloq dokument ta' identifikazzjoni għall-istudenti tal-Erasmus (e-ID) li jservi bħala identifikazzjoni uffiċjali matul is-soġġorn tagħhom barra minn pajjiżhom u jeżentahom mill-proċessi ta' reġistrazzjoni kkumplikati fil-pajjiżi ospitanti tagħhom. Dan għandu jżid ukoll it-trasparenza għall-awtoritajiet nazzjonali. L-identifikazzjoni elettronika tista' tintuża għal skopijiet oħra, pereżempju, bħala metodu ta' ħlas fl-universitajiet, pass għat-trasport jew karta tas-saħħa, skont il-mudell introdott fl-Estonja.