Dwar in-nuqqas ta' konformità tal-leġiżlazzjoni Taljana dwar il-ħin tax-xogħol mal-leġiżlazzjoni Ewropea 

Il-petizzjonant jilmenta li l-leġiżlazzjoni Taljana dwar il-ħin tax-xogħol ma nġabitx f'konformità mal-leġiżlazzjoni Ewropea. Id-Direttiva 2003/88/KE tirrikjedi li l-Istati Membri jieħdu l-miżuri neċessarji biex jiżguraw li l-ħaddiema ta' billejl li x-xogħol tagħhom jinvolvi perikli speċjali jew strapazz fiżiku jew mentali qawwi ma jkunux jistgħu jaħdmu aktar minn tmien sigħat fi kwalunkwe perjodu ta' 24 siegħa. Skont il-petizzjonant, dawn id-dispożizzjonijiet mhumiex prattikabbli fl-Italja, fejn mhijiex ipprovduta protezzjoni adegwata għall-ħaddiema. Il-petizzjonant jirreferi b'mod partikolari għax-xogħol ta' billejl mit-tobba u l-infermiera impjegati f'organizzazzjonijiet tal-kura tas-saħħa. Il-petizzjonant għalhekk jitlob lill-Parlament Ewropew jiżgura li l-Italja tikkonforma mal-leġiżlazzjoni Ewropea dwar il-ħin tax-xogħol.