F'isem l-Assoċjazzjoni Ġermaniża għar-Riċerka dwar il-Munizzjon, dwar l-implimentazzjoni tal-Artikolu 11 tad-Direttiva tal-UE dwar l-Armi tan-Nar 

Il-petizzjonant huwa tal-fehma li d-Direttiva dwar l-Armi tan-Nar (2017/853), minħabba r-rekwiżiti tagħha għal implimentazzjoni nazzjonali, tagħmel ir-riċerka dwar il-munizzjon f'kuntest internazzjonali kważi impossibbli. Huwa jsostni li l-laqgħat tar-riċerkaturi tal-munizzjon organizzati mill-Assoċjazzjoni Ewropea tar-Riċerka dwar l-Iskrataċ normalment isiru b'mod alternat fil-Ġermanja, fin-Netherlands u fl-Iżvizzera. Huwa jsostni li l-għan ta' dawn l-avvenimenti hu li fil-laqgħat jinġieb munizzjon fi kwantitajiet żgħar (oġġetti individwali jew unitajiet żgħar tal-imballaġġ) sabiex jiġu ppreżentati jew skambjati riżultati tar-riċerka, jiġu estiżi l-kollezzjonijiet tar-riċerkaturi jew biex l-iskrataċ jinbiegħu, jiġu eżibiti jew jiġu eżaminati. Il-petizzjonant isostni li, skont l-Artikolu 11 tad-Direttiva, hija meħtieġa awtorizzazzjoni uffiċjali għal kwalunkwe trasferiment lejn Stat Membru ieħor u li l-istess japplika għall-bejgħ ta' munizzjon. Skont il-petizzjonant, dan mhuwiex prattiku, huwa loġistikament kumpless ħafna u jiswa ħafna flus. Għalhekk, il-petizzjonant qed jitlob li l-Artikolu 11 tad-Direttiva jiġi rivedut jew interpretat bil-għan li jiġu eżentati trasferimenti transfruntiera ta' munizzjon għal skopijiet ta' riċerka.