Dwar l-allegat ksur min-naħa tal-Greċja tad-Direttiva 83/182/KEE fir-rigward ta' bastimenti għar-rikreazzjoni  

Il-petizzjonant iqis li r-regoli Griegi dwar id-dħul u t-taxxi fuq bastimenti għar-rikreazzjoni jiksru d-Direttiva 83/182/KEE dwar eżenzjonijiet mit-taxxa ġewwa l-Komunità għal ċerti mezzi ta' trasport temporanjament importati fi Stat Membru minn Stat Membru ieħor. Minbarra l-ħlas ta' ċerti imposti li ma jeżistux bl-istess mod għall-vetturi tat-triq, hemm rekwiżit għal reġistrazzjoni estensiva. Il-petizzjonant ma jistax jara raġuni oġġettiva għaż-żewġ każijiet li qed jiġu ttrattati b'mod differenti. Huwa jitlob li d-dispożizzjonijiet Griegi eżistenti jitneħħew u li jitħallsu lura l-ammonti indebitament irċevuti mill-Gvern Grieg.