Dwar iż-żieda taz-zokkor fl-ikel u l-ħtieġa ta' dispożizzjonijiet tal-UE bħar-Regolament (UE) Nru 1169/2011 

Il-petizzjonant jiġbed l-attenzjoni għar-rakkomandazzjonijiet tad-WHO dwar is-saħħa li jfittxu li jillimitaw il-konsum ta' zokkor kuljum mill-adulti, mit-tfal u mit-trabi, filwaqt li jindika li konsum eċċessiv ta' zokkor huwa ta' ħsara għas-saħħa. Filwaqt li r-Regolament (UE) Nru 1169/2011 dwar l-għoti ta' informazzjoni dwar l-ikel jirrikjedi t-tikkettar ta' addittivi li huma partikolarment ta' ħsara fl-ikel, fejn jingħtaw kwantitajiet ta' referenza għaz-zokkor, ma jinkludix limiti massimi f'konformità mar-rakkomandazzjonijiet tad-WHO dwar kwantitajiet ta' zokkor li huma ta' ħsara għas-saħħa. Il-petizzjonant jitlob biex ir-regolament jiġi emendat kif xieraq. Huwa josserva wkoll li l-manifatturi għandhom iżidu fuq it-tikketti tal-prodotti tagħhom twissija tal-perikli għas-saħħa mill-konsum eċċessiv ta' zokkor, simili għat-twissijiet tas-saħħa fuq il-pakketti tas-sigaretti, referenza għar-rakkomandazzjonijiet tad-WHO kif ukoll it-terminu "zokkor ħieles" skont dawn ir-rakkomandazzjonijiet. Ir-reklamar ta' ikel li fih iz-zokkor indirizzat lejn it-tfal għandu jkun ipprojbit, kif ukoll għandha tkun ipprojbita ż-żieda ta' zokkor ħieles f'ikel għal tfal żgħar u trabi li għandhom inqas minn sentejn. Huwa jitlob ukoll li tiġi introdotta "taxxa fuq iz-zokkor", b'mod partikolari taxxa miżjuda fuq il-prodotti tal-ikel u x-xorb li fihom iz-zokkor ħieles.