295 signatures
Collection finished
Petition is addressed to: Chambre des députés
Mir fuerderen d’Lëtzebuerger Regierung op:
- sech derfir anzesetzen, datt de Wollef och weiderhin europawäit als eng geschützten Déierenaart gëllt an datt d’Eliminatioun vun eenzelen Déieren nëmmen a kloer justifizéierten Ausnamefäll méiglech ass;
- sech derfir anzesetzen, datt d’Wëssen iwwert de Wollef an aner sougenannte grouss Raubdéieren an hier Roll am Ekosystem ausgebaut gëtt;
- zesumme mat den aneren EU-Memberstaaten Propositiounen auszeschaffen, wéi d’Zesummeliewe vu Mënsch an Déier besser gestallt ka ginn a sech kategoresch géint d’Zerstéierung vun de natierleche Liewensraim vun den Déieren anzesetzen;
- och hei am Land Moossnamen ze ergräifen, déi e bessere Schutz vu wëllen Déieren an hiren natierleche Liewensraim garantéieren. Eis Landschaften an domadder och de natierleche Liewensraum vu Planzen an Déieren däerfen net weider morcelléiert ginn. Di sougenannte „mesures compensatoires“ oder „mesures d’atténuation” däerfe keng bëlleg Excuse fir d’Zerstéierung vun der Natur duerch iwwerflësseg Groussprojeten an Infrastrukturmoossname sinn.
- konkret Propositiounen auszeschaffen, wéi d’Verbindung tëscht de verschiddene Naturparken a -reserve ka gestäerkt ginn. Fräizäitaktivitéiten an Tourismus däerfen net op Käschte vun der Natur goen.
- doriwwer nozedenken, d’Juegd an de lëtzebuergeschen Naturparken an an de Natur- a Vulleschutzgebidder ganz ze verbidden;
- Aktivitéiten, déi zu engem bessere Verständnis vum Fonctionnement vun eisen Ekosystemer bäidroen, auszebauen an ze ënnerstëtzen.
Mir fuerderen d’Lëtzebuerger Europa-Deputéierten op, sech zu Bréissel konsequent fir de Schutz vum Wollef, den Aarteschutz an de Schutz vun eisen Ökosystemer anzesetzen.
Reason
Enn 19. Joerhonnert gouf de Wollef zu Lëtzebuerg an an de meeschten anere westeuropäesche Länner total ausgerott. Vru puer Joerzéngte sinn di éischt Wëllef aus Osteuropa a Richtung Weste gezunn an hunn sech do, wou se gënschteg Bedingunge fonnt hunn, néiergelooss.
Nodeems de Wollef 1979 zesumme mat puer honnert aner Déieren a Planzenaarten duerch di sougenannte Konventioun vu Bern fir den Erhalt vun den europäesche wëllen Déieren a Planzenaarten an hier Liewensraim vum Europarot geschützt gouf, gouf en 1992 och iwwer di sougenannten Habitat-Direktive vun der EU geschützt. E gëllt domadder als eng Déierenaart, där hiren Erhalt am Interessi vun der EU läit an däerf nëmmen ënner ganz restriktive Bedingunge geschoss ginn. Am Juni 2020 huet den Europäesche Geriichtshaff an engem Arrêt präziséiert, datt dëse Schutz net op di sougenannten natierlech Liewensraim vum Wollef limitéiert ass, mä och fir Wëllef gëllt, di dës Liewensraim verlooss hunn an sech a mënschleche Siidlungsgebidder ophalen.[1]
No der "Large carnivore initiative for Europe" ginn et haut nees eng 17.000 Wëllef an Europa, woubäi di meeschte Wëllef nach ëmmer an Ost- a Südosteuropa liewen. Gréisser Populatioune gëtt et bis well soss just nach an den Alpen an am Norde vu Spuenien a Portugal.[2] Vrun zéng Joer goufen déi éischt Wëllef och an eise Géigende gesinn, mee bis well handelt ët sech just ëm eenzel Déieren, vun denen een unhuele kann, datt se „op Passage“ sinn, a net a Ruddelen.
Obwuel sech d’Verbreedungsgebitt vum Wollef an de leschte Jore staark vergréissert huet an d’Wollefspopulatioune vrun allem an deene Länner staark zougeluecht hunn, wou de Wollef ausgerott oder sou gutt wéi ausgerott war, ass et falsch dervun auszegoen, datt d’Presenz vum Wollef lo a ganz Europa geséchert wier. Mënschlech Aktivitéiten a vrun allem eng extrem Landschaftszersiidlung an eiser Géigend wäerten eng definitiv Barrière fir eng weider Verbreedung vum Wollef an d’Formatioun vu Ruddele sinn.
Trotzdeem entwéckelt sech op ville Plazen an Europa Oppositioun géint de Wollef, déi duerch eng Mëschung vu reellen Evenementer, vrun allem Attacken op Béischten, a festverwuerzelten Ängschte vrum béise Wollef geniert gëtt. Enn August huet d’Presidentin vun der Europäescher Kommissioun, Ursula von der Leyen, d’Memberstaaten opgefuerdert, d’Ausnamereegelen, déi an der Habitat-Direktive virgesi sinn, auszenotzen an hier eng Bestandsopnam iwwert d’Wollefspopulatioun an hiren Impakt ze präsentéieren.
[3] Domadder reagéiert si op eng Resolutioun vum Europaparlament vum November 2022[4], bei där et drëms geet, de Schutzstatus vum Wollef a Fro ze stellen an et méi einfach ze maachen, Wëllef ofzeschéissen.
Wéi 2017 di éischt eendeiteg Beweiser iwwert d’Presenz vun engem Wollef hei am Land virlouchen, gouf direkt en Aktiounsplang aus dem Hutt gezaubert. Och wann et duerchaus berechtegt ass, Ziichter fir de Verrass duerch Wëllef ze entschiedegen, respektiv Preventivmoossnamen ze finanzéieren, woubäi di meescht Verrëss souwuel vu Wëld wéi och vu Béischten nach ëmmer op Hënn zréckféiere sinn, bleift en negativen Androck: De Wollef ass schonn nees e Problem!
Wëllef, Bieren, Luchsen, Fiiss, Wëllschwäin, Routwëld oder Kueben : Wou ëmmer de Mënsch op wëll Déiere stéisst, oder d’Déieren op de Mënsch, kënnt et zu Problemer. Och wann et sécher ass, datt d’ekologescht Gläichgewiicht - duerch d’Agrëffer vum Mënsch! - op d’Kopp gestallt ass, ass et net legitim, d’Déieren, déi sech hiren natierleche Liewensraum zréckerueweren oder versichen, eng Plaz an onser „ziviliséierter“ Welt ze fannen, einfach ofzeknallen. Grad bei de sougenannte Raubdéieren, déi schonn ëmmer als Konkurrenz zum Jeeër a Sammler ugesi goufen, sinn d’Grenzen tëscht enger scheinbar legitimmer Reguléierung an enger neier Ausrottung fléissend. Dobäi beweise Beispiller, wéi déi aus dem Yellowstone Nationalpark, datt grad Wëllef ee positiven Impakt op d’Biodiversitéit kënnen hunn, andeems se eng Iwwerpopulatioun vu Paarhufer an en iwwerméissegt Ofweede verhënneren. A ville Fäll kënnen sinn och als sougenannten „espèce parapluie“ ugesi ginn: Vum Schutz vun hire Liewensraim profitéieren nämlech och eng ganz Rei aner Déieren a Planzen.
------
[1] Arrêt de la Cour (deuxième chambre) du 11 juin 202 ; C-88/19 - Alianța pentru combaterea abuzurilor, https://curia.europa.eu/juris/liste.jsf?num=C-88/19
[2] LCIE: Wolf - Canis lupus: Wolf facts, https://www.lcie.org/Largecarnivores/Wolf.aspx
[3] Commission européenne: Loups en Europe : La Commission invite les autorités locales à utiliser pleinement les dérogations existantes et recueille des données en vue de l'examen de leur état de conservation, 4 septembre 2023, https://ec.europa.eu/commission/presscorner/detail/fr/ip_23_4330
[4] Europäisches Parlament : Entschließung des Europäischen Parlaments vom 24. November 2022 zum Schutz der Viehwirtschaft und der Großraubtiere in Europa (2022/2952(RSP)), https://www.europarl.europa.eu/doceo/document/TA-9-2022-0423_DE.html
Petition details
Petition started:
09/16/2023
Petition ends:
12/15/2023
Region:
Luxembourg
Topic:
Environment
News
-
Petition was submitted
on 24 Jan 2024An engem Interview mam L'Essentiel (https://www.lessentiel.lu/.../luxembourg-les-aides...) huet de neien Emweltminister Serge Wilmes gëschter erklärt, Lëtzebuerg geng d'Propositioun vun der EU Kommissioun, den internationale Schutz vum Wollef rofzesetzen, nët ënnerstëtzen. Dozou huet hien erklärt, dat Lëtzebuerg bis well keng gréisser Problemer mam Retour vum Wollef hät, a wann ët sollt zu Problemer mat eenzelnen Déire kommen, géif nach ëmmer d'Méiglechkeet bestoen, op Dérogatiounen zrëckzegraifen, déi ët erlaaben, eenzel Déiren ze schéissen.
Domadder stellt sech de Minister an d'Kontinuitéit vun der fréirer Regierung, déi sech fir e strengen Aarteschutz vum Wollef an der EU agesaat huet. 293 Persounen haaten d'Lëtzebuerger Regierung, an enger Petitioun opgefuerdert, dem Wollef an der Biodiversitéit eng Chance ze gin.
Lo bleiwt ofzewaarden, wéi sech di aaner EU-Memberstaate positionéiren. Fir dat d'Propositioun vun der Kommissioun ugehol gët, mussen 55 Prozent vun de Memberstaaten, déi insgesamt 65 Prozent vun der Populatioun vun der EU repräsentéiren, zoustëmmen. Emgekéiert, kënen 35 Prozent vun de Memberstaaten d'Propositioun blockéiren.
Et bleiwt also spannend an de Match ass nët gewonn! -
Petition was submitted
on 08 Jan 2024D'Petitioun gouf demoien mat 293 Ennerschrëften un de neien Emweltminister Serge Wilmes geschëckt. D'Lëtzebuerger Regierung haat vrun engem Joer zesummen mat de Regierungen vun 11 aaner EU-Memberlänner un d'Kommissioun appeléiert bei hierer "verstänneger Approche" vis-à-vis vum Schutz vum Wollef ze bleiwen.
Kuerz vru Chrëschtdaag huet d'Kommissioun lo eng Propositioun gemaat, fir de Wollef aus der Annexe II an d'Annexe III vun der Berner Aarteschutzkonventtioun ze déplazéiren. Domadder wier en da nët méi streng geschützt, mä just nach geschützt a kéint méi einfach geschosss gin. Mir hoffen, dat di nei Regierung, déi Propositioun nët matdréit.
Wann de Conseil d'Propositioun vun der Kommissioun unhuele geng, woufir eng qualifizéiert Majoritéit am Conseil néideg ass, kéint eng entsprechend Demande un de Standing Committee vun der Berner Aarteschutzkonventioun geriicht gin. Nach vrun engem Joer haat d'EU-Kommissioun d'Memberstaaten iwerzeegt, sou enger Demande vun der Schwaiz nët zouzestëmmen. D'Kommissioun huet deemols drop higewisen, dat den Erhaltungszoustand vum Wollef just an 18 vun 39 biogeographeschen Régiounen vun der EU positiv wier. -
Debate
Le loup doit faire partie de la faune sauvage indigène, notamment pour endiguer la surpopulation des sangliers. La chasse de loisir traditionnelle n'arrive pas à faire cette tâche avec comme conséquence des dégâts dans l'agriculture, la viticulture, les vergers et même les jardins. Le retour du loup n'est qu'un rétablissement d'une situation historique.
No CONTRA argument yet.
