Die petisie is gerig aan:
Kuvendi i Shqipërisë
PETICION
Drejtuar:
- Presidentit të Republikës së Shqipërisë
- Kryeministrit të Republikës së Shqipërisë
- Ministrisë për Evropën dhe Punët e Jashtme
- Ministrisë së Brendshme të Republikës së Shqipërisë
Lënda: Kërkesë për rishikimin dhe lehtësimin e procedurës së rifitimit të shtetësisë shqiptare për shqiptarët që jetojnë në Gjermani
Rede
Të nderuar përfaqësues të institucioneve shqiptare,
Ne, ish-shtetas shqiptarë, aktualisht zotërues të shtetësisë gjermane, ju drejtohemi me këtë peticion për të kërkuar një zgjidhje për një problem administrativ serioz që na pengon të rifitojmë shtetësinë tonë shqiptare.
Shumë prej nesh kemi qenë të detyruar të heqim dorë nga shtetësia shqiptare për të marrë atë gjermane, për shkak të ligjeve të shtetit gjerman. Në qershor të vitit 2024, Gjermania miratoi ligjin që lejon dyshtetësinë, duke na dhënë mundësinë ligjore për të rifituar shtetësinë shqiptare.
Megjithatë, përballemi me një pengesë burokratike të pajustifikueshme: kthimin ose refuzimin e aplikimeve tona për shkak të mungesës së dokumenteve që nuk lëshohen nga shteti gjerman.
Problemet kryesore:
- Kërkesa për dokumente që nuk mund të sigurohen në Gjermani – Autoritetet shqiptare kërkojnë certifikatën e lindjes dhe certifikatën familjare të lëshuara nga vendi i huaj, pra në këtë rast Gjermania. Duhet theksuar se Dokumenti "certifikatë e lindjes" nuk lëshohet nga shteti gjerman për personat që nuk kanë lindur në Gjermani dhe se Dokumenti "certifikatë familjare" nuk ekziston në sistemin administrativ gjerman për këdo qoftë. Si rezultat, aplikantët nuk kanë asnjë mundësi për të përmbushur kërkesat.
- Refuzimi ose kthimi i aplikimeve – Për shkak të mungesës së këtyre dokumenteve, shumë kërkesa për rifitimin e shtetësisë janë refuzuar ose kthyer mbrapsht, duke krijuar pasiguri dhe vonesa të panevojshme.
- Mungesa e fleksibilitetit nga institucionet shqiptare – Nuk është parashikuar asnjë alternativë ose mekanizëm zëvendësues për dokumentet që nuk ekzistojnë në sistemin gjerman.
- Ndryshimi i papritur i kërkesave – Në fillim të dhjetorit 2024, procedurat për rifitimin e shtetësisë shqiptare u ndryshuan dhe u zbatuan menjëherë, pa marrë parasysh faktin që shumë aplikantë i kishin përgatitur dokumentet sipas rregullave të mëparshme. Kjo ka shkaktuar konfuzion dhe humbje kohe për shumë persona të prekur nga ndryshimi.
Kërkesat tona:
- Rishikimi urgjent i listës së dokumenteve të kërkuara, duke eliminuar ato që nuk mund të sigurohen në Gjermani, veçanërisht certifikatën e lindjes dhe certifikatën familjare. Duhet gjithashtu të merret parasysh fakti që Shteti Gjerman nuk lëshon një vërtetim për mungesën e këtyre dokumenteve, duke e bërë të pamundur plotësimin e kërkesave të vendosura nga autoritetet shqiptare.
- Rishikim dhe konsultim me përfaqësues të komunitetit shqiptar në Gjermani, organizatat e diasporës dhe Ambasadën Shqiptare në Berlin, për të gjetur një zgjidhje efikase dhe të drejtë.
- Të ketë një zgjidhje të qartë dhe të njëjtë për të gjithë shqiptarët në diasporë, që të shmangen trajtimet e ndryshme nga ambasadat apo institucionet e ndryshme shqiptare.
- Të ofrohet një periudhë tranzicioni për aplikantët që kanë përgatitur dokumentet sipas rregullave të mëparshme, duke u dhënë mundësinë të vazhdojnë procesin pa penalizime apo vonesa shtesë.
- Rifitimi i shtetësisë për ata që e kanë lënë të detyruar të operohet vetëm me një kërkesë dhe me dosjen përkatëse të mbajtur në Presidencën e Shqipërisë, duke shmangur procedura të panevojshme dhe burokraci të tepërt.
Ne, nënshkruesit e këtij peticioni, kërkojmë që ky problem të marrë vëmendjen e duhur dhe të gjendet një zgjidhje e drejtë dhe e shpejtë.
