Deklaratë E Personelit Shëndetësor Në Mbështetje Të Protestës Së Studentëve

Petition richtet sich an: Kryeministrit Edi Rama

Ne, nënshkruesit e kësaj deklarate, mjekë, stomatologë, infermierë, farmacistë dhe punonjës të tjerë të shëndetësisë në Shqipëri dhe në Diasporë, i bashkohemi protestës së studentëve në mbrojtje të jetës, dinjitetit dhe së ardhmes së Shqipërisë.

Misioni ynë për të mbrojtur jetën dhe shëndetin dhe për të lehtësuar vuajtjen na ngarkon me përgjegjësinë të reagojmë kur cenohen integriteti dhe dinjiteti njerëzor. Nuk mund të qëndrojmë të heshtur përballë dhunës ndaj të rinjve dhe cenimit të së drejtës së tyre për protestë paqësore. Arsimimi cilësor, mundësitë e ndershme dhe e drejta për të ndërtuar të ardhmen në vendin e tyre janë çështje që na përkasin të gjithëve.

Në kushtet e krizës së krijuar, mbrojtja e jetës, respektimi i të drejtave dhe marrja e përgjegjësive kërkojnë veprime të menjëhershme. Për këtë arsye:

Kërkojmë dorëheqjen e kryeministrit Edi Rama, si akt të marrjes së përgjegjësisë politike për krizën dhe përshkallëzimin e saj, dhe krijimin, në përputhje me Kushtetutën, të një qeverie tranzitore me përbërje teknike që të mundësojë daljen paqësore nga kjo situatë, funksionimin e institucioneve, rikthimin e besimit qytetar dhe respektimin e vullnetit të qytetarëve.

Dënojmë dhunën e ushtruar ndaj studentëve dhe, në veçanti, ndaj atyre që janë angazhuar për t’u dhënë ndihmën e parë të lënduarve. Dhuna ndaj personave që japin ndihmë rrezikon njëkohësisht jetën e tyre dhe të atyre që presin të ndihmohen. Studentët, vullnetarët dhe personeli shëndetësor që ofrojnë ndihmë duhet të mbrohen dhe të kenë mundësi të veprojnë në siguri, pa pengesa, kërcënime apo sulme.

Kërkojmë ndalimin e menjëhershëm të dhunës së paligjshme ndaj studentëve dhe qytetarëve. U bëjmë thirrje punonjësve të Policisë së Shtetit të garantojnë mbrojtjen e jetës dhe shëndetit të të gjithë qytetarëve, si dhe paprekshmërinë e pronës publike e private, duke vepruar në çdo rast në përputhje me ligjin.

Kërkojmë që ndërhyrjet policore të mbrojnë edhe banorët, kalimtarët dhe personat që nuk marrin pjesë në protestë. Përdorimi në përmasa të mëdha i gazit lotsjellës në qendër të qytetit dhe në zona të banuara mund të ekspozojë pa dallim qytetarë të çdo moshe, përfshirë fëmijët, të moshuarit dhe të sëmurët.

Si profesionistë të shëndetësisë, e konsiderojmë të papranueshme lënien pa ndihmë të personave të lënduar, veçanërisht kur janë pa ndjenja ose në pamundësi për të kërkuar ndihmë.
Kërkojmë hetim të shpejtë, të pavarur, të plotë dhe transparent të çdo denoncimi për abuzim, përfshirë çdo veprim apo mosveprim që ka shkaktuar dëmtime, ka rrezikuar jetën ose ka penguar apo vonuar dhënien e ndihmës shëndetësore.

U bëjmë thirrje përfaqësive diplomatike dhe organizatave ndërkombëtare të ndjekin nga afër zhvillimet, të mbajnë qëndrime publike të qarta në mbrojtje të të drejtave dhe lirive themelore dhe të këmbëngulin për hetime të pavarura e efektive dhe përgjegjësi për çdo shkelje. Mbrojtja e jetës dhe e protestës paqësore kërkon vëmendje të veçantë dhe angazhim të vazhdueshëm.

U bëjmë thirrje protestuesve të ruajnë karakterin paqësor të protestës, të mos bien pre e provokimeve dhe të mbrojnë njëri-tjetrin. Të shmangin çdo veprim që rrezikon jetën ose cenon sigurinë e njerëzve. Protesta qytetare e ruan forcën e saj duke mbrojtur dinjitetin njerëzor dhe qëllimin e përbashkët të kësaj përpjekjeje.

U bëjmë thirrje kolegëve tanë në të gjitha profesionet e shëndetësisë, si dhe qytetarëve, t’u bashkohen studentëve me praninë, zërin dhe solidaritetin e tyre. Angazhimi ynë duhet të garantojë njëkohësisht vazhdimësinë e shërbimeve shëndetësore dhe kujdesin e pandërprerë për pacientët.

Bashkë me studentët, për jetën, dinjitetin dhe të ardhmen e Shqipërisë.